Published by Lankadeepa
අගෝස්තු මාසය අවසන් වන විට ශ්‍රී ලංකාව ජාත්‍යන්තර මූල්‍ය අරමුදලේ වැඩසටහනට අදාළව ඉටුකළ යුතු කැපවීම් 57 න් ඉටුකර ඇත්තේ 38 ක් පමණක් බව වෙරිටේ රිසර්ච් ආයතනය පවසයි. පසුගිය මාසය අවසන් වන විට කැපවීම් 38 ක් ශ්‍රී ලංකාව ඉටුකර ඇතත් මූල්‍ය විනිවිදභාවය ප්‍රදර්ශනය කිරීම සඳහා වන මාර්ග ගත වේදිකාවක් පිහිටුවීම යන ප්‍රධාන කැපවීමක් ශ්‍රී ලංකාව තවමත් ඉටු කිරීමට අපොහොසත් වී ඇති බවත් එය ඉටුකළ යුතුව තිබුණේ පසුගිය මාර්තු මාසය අවසානයේ බවත් වෙරිටේ රිසර්ච් ආයතනය ප්‍රකාශ කර තිබේ.
ශ්‍රී ලංකාව ජාත්‍යන්තර මූල්‍ය අරමුදලේ වැඩසටහනට අදාළව ඉටුකළ යුතු කැපවීම් වල ප්‍රගතිය මැනීම සඳහා වෙරිටේ රිසර්ච් ආයතනය හඳුන්වා දුන් අයි.එම්.එෆ් මීටරයට අගෝස්තු මස අවසන් වන විට ඉටු කළ යුතුව තිබූ කැපවීම් 11 ක ප්‍රගතිය මැනීම සඳහා ප්‍රමාණවත් දත්ත නොතිබීම හේතුවෙන් එම කැපවීම් 11 නොදනී කාණ්ඩයට ඇතුළත් කර තිබෙන බවත් එසේම අගෝස්තු මස අවසන් වන විට ඉටුකළ යුතුව තිබූ තවත් කැපවීම් 8 ක් ශ්‍රී ලංකාව ඉටුකර නොමැති බවත් වෙරිටේ රිසර්ච් ආයතනය පෙන්වා දී ඇත
ශ්‍රී ලංකාව ජාත්‍යන්තර මූල්‍ය අරමුදලේ වැඩසටහනට අදාළව ලබා ඇති ප්‍රගතිය සමාලෝචනය කිරීමට සහ දෙවන ණය වාරිකයට අනුමැතිය ලබා දීම සඳහා ජාත්‍යන්තර මූල්‍ය අරමුදලේ නියෝජිතයන් පිරිසක් මෙම සතියේ ශ්‍රී ලංකාවට පැමිණියත් දෙවන ණය වාරිකය සඳහා ශ්‍රී ලංකාවට අනුමැතිය ලැබීම ඔක්තෝබර් මස අවසානය තෙක් පමා වෙනු ඇතැයි අපේක්ෂා කරන බව වෙරිටේ රිසර්ච් ආයතනය පවසයි.
මෙම සමාලෝචනයේදී බොහෝ දුරට ජූනි මස අවසන් වන විට ඉටු කළ යුතු කැපවීම් කෙරෙහි අවධානය යොමු වීමට ඉඩක් තිබෙන බව වෙරිටේ රිසර්ච් ආයතනය පෙන්වා දී ඇත.
ශ්‍රී ලංකාව ජාත්‍යන්තර මූල්‍ය අරමුදලේ වැඩසටහනට අදාළව ඉටුකළ යුතු සම්පූර්ණ කැපවීම් 100 ක ප්‍රගතිය මැන බැලීම සඳහා වෙරිටේ රිසර්ච් ආයතනය අයි.එම්.එෆ් මීටරය හඳුන්වා දී තිබේ.එම සම්පූර්ණ කැපවීම් 100 න් 57 ක් අගෝස්තු මාසය අවසන් වන විට ශ්‍රී ලංකාව ඉටු කළ යුතුව තිබී ඇත.
Last modified: April 26, 2024
